د هوايي چلند په چارو کې يوه هالنډۍ تخصصي رسنۍ راپور ورکړی چې امريکا په ۲۰۱۷ کال کې په عراق او سوريه کې د خپلو ځانګړو عملياتو لپاره په منځنۍ اسيا کې څلور اف ۱۱۷ الوتکې ځای پر ځای کړې وې.
هالنډي رسنۍ وبګاه ادعا کړې چې دغه الوتکې کنټرولېدونکي بمونه غورځولای شي او په سوريه او عراق کې د امريکا په ځانګړو عملياتو کې ترې ګټه اخيستل شوې.
له دې الوتکو ګټه اخيستل ځکه ځانګړي بلل شوي دي، چې په ۲۰۰۸ کال کې امريکا اعلان کړی و چې نور به له دې الوتکو کار نه اخیستل کېږي ځکه د دې پر ځای اف ۲۲ او اف ۳۵ الوتکې جوړې شوې دي او تر دې الوتکو ډېرې پرمختللې دي.
خو دا چې پر دې سربېره هم امريکا ولې له دې الوتکو استفاده کړې لا هم څرګنده نه ده.
