په يمن کې ايران پلوه وسله واله ډله انصارالله وايي، په سعودي عربستان کې نهه هغه بريتانوي سرتېري وژل شوي، چې د يمن پر پوله يې پر حوثي وسله والو د سعودي په بريدونو کې مرسته کوله.
انصارالله تېره شپه اعلان وکړ، چې يادو بريتانوي سرتېرو په يمن د بريدونو په تړاو سعودي ته مشورې ورکولې.
دا په داسې حال کې ده، چې تېره اونۍ ډېلي اېکسپرېس ورځپاڼې هم په سعودي كې د دوو انګرېزي سرتېرو د ټپي کېدو خبر ورکړی و.
دا سرتېري د هغو پټو عملياتو برخه وو، چې د امريکا په مشرۍ د سعودي له خاورې په يمن کې ترسره کېږي.
سعودي عربستان او متحده عربي اماراتو په ۱۳۹۴يم لمريز کال کې د امريکا او يو شمېر اروپايي هېوادونو په ملاتړ په يمن کې عمليات پيل کړل.
دغه ايتلاف وايي، هدف يې بېرته واک ته د يمن د جمهور رئيس عبدربه منصور هادي ګرځول دي.
