د امريکا جمهور رئيس ډونالډ ټرمپ له مکسيکو سره پر پوله د سرحدي دېوال د جوړولو لپاره بېړنى حالت اعلان کړى دى.
په داسې حال كې، چې کانگرېس د ټرمپ غوښتنه نه ده منلې، د بېړني حالت اعلان ده ته د دې اجازه ورکوي، چې د اړتيا وړ پيسې له نورو سرچينو ترلاسه کړي.
کانګرېس د ياد كار لپاره منلې، چې جمهور رئيس ته يو اعشاريه څلور ميليارده ډالر ورکړي، خو ټرمپ د خپل دغه پلان لپاره له کانګرېسه پنځه اعشاريه اووه ميليارده ډالر غوښتي وو.
ټرمپ په ۲۰۱۶م ميلادي كال كې د جمهوري رياست په ټاكنيز کمپاين کې له خپلو پلويانو سره ژمنه کړې وه، چې د بريا په صورت کې به د امريکا او مکسيکو پر ګډه پوله کانکرېټي دېوال جوړ کړي.
نوموړي هغه مهال دا ژمنه هم کړې وه، چې د دېوال پېسې به له مکسيکو اخلي.
ټرمپ امريکا ته د غيرې قانوني کډوالو د ورتګ د مخنيوي په هدف د دېوال جوړول ضروري بولي.
کلید ګروپ په ټویټر او فیسبوک کې وګورئ
