په يوه جالب اقدام کې د امريکا جمهور رئيس ډونالډ ټرمپ د ۲۰۱۶م ميلادي کال په ټاکنو کې د روسيې او ټرمپ د اړيکو د قضيې له څېړونکي رابرټ مولر مننه کړې ده.
ټرمپ وروسته له هغه له مولر مننه وکړه، چې نوموړي په يوه بيان کې د ټرمپ او د هغه د وکيل په تړاو يو جنجالي راپور رد کړ.
يوې امريكايي خبري وېبپاڼې راپور خپور کړ، چې ګواكې ټرمپ خپل وکيل مايکل کوهن ته ويلي، ترڅو په روسيه كې د ټرمپ ټاور د جوړېدو په تړاو د استازو مجلس ته دروغ ووايي.
دې راپور په امريکا کې پراخ غبرګونونه راوپارول او کارپوهانو وړاندوينه وکړه، چې که دا راپور تاييد شي، ښايي ټرمپ له استعفا يا استيضاح سره مخ شي.
خو د مولر وياند په يوه غيرې اټکلي اقدام کې دغه راپور ناسم او دروغ وباله.
ټرمپ هم، چې ډېری وخت يې پر مولر لفظي بريدونه کول، په يوه بيان کې وويل، نوموړی له مولر مننه کوي، چې يو په دروغو جوړ شوی راپور يې رد کړ.
د هغه په خبره، مولر مناسب کار وکړ او د نوموړي دا کار د ستاينې وړ دی.
