په سوريه کې په بېلابېلو توغندويي او هوايي بريدونو کې ۱۳ داعشيان او څلور ملکي وګړي وژل شوي او اووه داعشيان ټپيان دي.
په عراق کې د حشد شعبي ډلې يوه قوماندان اعلان کړی، چې دا بريدونه دوى كړي دي.
قاسم مصلح ويلي، دغه توغندي د سوريې پر المراشده، موزان، سوسه، الباغوز او يو شمېر نورو سيمو توغول شوي دي.
په دې بريدونو کې د داعش ډلې اړوند يو روغتون هم په نښه شوی دى.
په ورته وخت كې راپورونه وايي، د سوريې په ديرالزور ولايت کې د امريکايي ځواکونو په هوايي بريدونو کې دوه سوريايي ماشومان او دوه ښځې وژل شوې دي.
دا په داسې حال کې ده، چې دوه ورځې وړاندې هم د امريکا په مشرۍ د داعش ضد ايتلاف په ديرالزور کې په خپلو هوايي بريدونو کې د ښځو او ماشومانو په ګډون ۲۶ ملکيان ووژل.
