د ټاكنو خپلواك كمېسيون يو ځل بيا ټينګار كوي، هغه كسان به د قانون منګولو ته وسپارل شي، چې د ولسي جرګې ټاكنو په مهال يې سرغړونې او درغلۍ كړې دي.
د دې كمېسيون رئيس ګلاجان عبدالبديع صياد نن په كابل كې يوې غونډې ته وويل، په دغو ټاكنو كې ستونزې او د بېلابېلو لورو مداخلې موجودې وې او آن د ټاكنو يو شمېر كاركوونكي ګواښل شوي هم دي.
نوموړي زياته كړه، زورواكو په ټول توان له خپل زوره كار اخيستى او ځينو څارونكو په سمه توګه خپل كار نه دى ترسره كړى.
صياد د ټولو ټاكنيزو شكايتونو پر څېړنې ټينګار وكړ او په خبره يې، د رايو د بيا شمېرنې او ابطال لپاره به د ټاكنو خپلواك او ټاكنيزو شكايتونو كمېسيونونه ګډ تصميم نيسي.
دا په داسې حال كې ده، چې د ټاكنو خپلواك كمېسيون د ولسي جرګې په ټاكنو كې پر كمزوري او ناسم مديريت تورن شو.
