د لغمان ولايتي چارواکي وايي، په دې ولايت کې تېره شپه د زيات اورښت له کبله سېلابونه راوتلي چې په پايله کې يې د دې ولايت اليشنګ ولسوالۍ په اړينې سيمه کې درې ماشومان مړه شوي دي.
د والي وياند اسدالله دولتزی وايي په مړو شويو ماشومانو کې د دوو جسدونه موندل شوي او د يوه يې لادرکه دی.
دی وايي سېلابونو په بېلابېلو ولسواليو کې په زياته اندازه کرنيزه ځمکه هم زيانمنه کړې ده.
د والي وياند زياته کړه، دوی په ياده سيمه کې له زيانمنو کورنيو سره د مرستو تابيا نيولې او ژر به له ټولو سره مرسته ترسره کړي.
