د امريکا د ملي امنيت سلاکار روسيې ته خبرداری ورکړی، چې د دغه هېواد په ټاکنو کې به د مسکو لاسوهنه ونه زغمي.
جان بولټن پرون د روسيې د ملي امنيت شورا له منشي سره د خپلې ليدنې په تړاو د معلوماتو ورکولو په مهال دغه مطلب څرګند کړ.
نوموړي پر دې د ټينګار ترڅنګ، چې روسي وګړو د امريکا په ټاکنو کې لاسوهنه کړې، زياته کړه، خپلو روسي ملګرو ته يې ويلي، پوهېږي چې د امريکا په ټاکنو د روسيې لاسوهنې خپلې اغېزې لرلې دي، خو مهمه موضوع بل څه ده.
د بولټن په خبره، د امريکا په ټاکنو کې لاسوهنې ته د مسکو لېوالتيا پر روسانو د بې باورۍ سبب شوې او دی عقيده لري، چې امريکا به دغه موضوع ونه زغمي.
