د کندهار د ژېړۍ ولسوالۍ په دښت سيمه كې پرون مازديګر د ماين چاودنې ۱۸ ملكي وګړو ته مرګ ژوبله اړولې ده.
د دغه ولايت د والي وياند عزيز احمد عزيزي وايي، د ملکي وګړو يو ټونس ډوله موټر د سړک غاړې پر ماين برابر شوى او چاودنه يې کړې ده.
نوموړى زياتوي، په دې پېښه كې دوه نجونې وژل شوې او د ښځو او ماشومانو په ګډون ۱۶ تنه ټپيان دي.
د عزيزي په وينا، دا ماين تازه د وسله والو مخالفينو لخوا ځاى پر ځاى شوى و، چې ملکي وګړي يې ښکار شول.
د دولت وسله والو مخالفينو تراوسه په دې تړاو څه نه دي ويلي.
دا لومړى ځل نه دى، چې د وسله والو له لوري ښخ شوى ماين ملکي وګړو ته مرګ ژوبله اړوي، بلکې په كندهار كې تر دې وړاندې هم ورته پېښې رامنځته شوې دي.
