د افغانستان د كركټ له ۱۹ كلونو د كم عمره ځوانانو ملي لوبډلې په بنګله دېش كې د اسيا جام سياليو په ترڅ كې خپله دوهمه لوبه نن د نيپال له لوبډلې وګټله.
د لوبې پچه د نيپالۍ لوبډلې لوبډلمشر وګټله او د توپوهنې پرېكړه يې وكړه.
نيپال په ۳۸ اعشاريه ۳ اورونو كې د ټولو لوبغاړو په سوځېدو ۱۳۱ منډې وكړې، خو افغانستان وركړل شوى هدف په ۳۷ اعشاريه ۳ اورونو كې د اوو لوبغاړو په له لاسه وركولو پوره كړ او د درېيو وېكټو په توپير يې لوبه وګټله.
تر دې مخكې وړمه ورځ د افغانستان د كركټ له ۱۹ كلونو د كم عمره ځوانانو ملي لوبډلې په خپله لومړۍ لوبه كې د متحده عربي اماراتو لوبډلې ته په پنځو وېكټو ماتې وركړې وه.
افغانستان به په ګروپي پړاو سياليو كې خپله وروستۍ لوبه سبا له هند سره وكړي.
