د پاکستان حکومت په دې هېواد كې د مېشتو افغانو کډوالو د پاتې کېدو موده د ۲۰۱۹م ميلادي كال د جون مياشتې تر پايه وغځوله.
د پاكستان د اطلاعاتو وزير فواد چوهدري خبريالانو ته وويل، دا پرېكړه د پنجشنبې په ورځ د لومړي وزير عمران خان په مشرۍ د كابينې په غونډه كې وشوه.
نوموړي زياته كړه، اوس مهال په پاكستان كې نېږدې ۹۰۰ زره اسناد لرونكي او شاوخوا ۵۰۰ زره غيرې قانوني افغان كډوال ژوند كوي.
د پاكستان كابينې ياده پرېكړه په داسې حال كې كړې، چې په دې وروستيو كې افغان كډوالو ته د تابعيت وركولو په اړه د عمران خان څرګندونو بېلابېل غبرګونونه وپارول.
د ملګرو ملتونو د كډوالو چارو اداره UNHCR وايي، په ۲۰۱۶م كال كې ۴۰۰ زره او په ۲۰۱۷م كې شاوخوا ۶۰ زره افغان كډوال له پاكستانه خپل هېواد ته ستانه شوي دي.
