جمهوري رياست د ننګرهار په مومندرې ولسوالۍ کې پر لاريون كوونكو د شوي ځانمرګي بريد څېړنه کوي.
د والي وياند عطاء الله خوږياڼي کليد ته وويل، له جمهوري رياست څخه د جمهور رئيس د سلاکار اسدالله فلاح په مشرۍ يو پلاوى دې ولايت ته د مومندرې ولسوالۍ د پېښې د څېړلو په هدف ور رسېدلې دى.
هغه زياته كړه، پلاوي تراوسه له والي حيات الله حيات، يو شمېر نظامي مسوولينو او قومي مخورو سره په دې اړه ناستې ترسره کړې دي.
د خوږياڼي په خبره، ورغلي پلاوي څېړنې پيل کړي او جزيات به يې وروسته له رسنيو سره شريك كړي.
د والي وياند وايي، له جمهوري رياست نه ورغلي پلاوي ډاډ ورکړى، چې په دقيق او شفاف ډول به د يادې پېښې اړوند ټولې څېړنې ترتيب او د وروستيو اجراآتو په هدف جمهور رئيس ته وسپاري.
د يادولو ده، چې څو ورځې وړاندې د مومندرې ولسوالۍ په ډکې سيمه کې پر لاريون کوونکو ځانمرګي بريد ۶۸ تنه ووژل او ۱۶۸ نور يې ټپيان کړل.
