د جمهور رئيس دوهم مرستيال وايي، د ملي يووالي حكومت د رڼو او عادلانه ټاكنو د ترسره كولو لپاره له ټولو امكاناتو كار اخلي.
سرور دانش نن د كابل د لويې جرګې په خېمه كې د شهيد اونۍ او د احمدشاه مسعود د وژل كېدو د ۱۷م تلين نمانځغونډې ته د وينا په مهال له خلكو، سياسي ګوندونو، مدني بنسټونو او نړيوالې ټولنې وغوښتل، چې د رڼو ټاكنو د ترسره كولو لپاره له حكومت او ټاكنيزو كمېسيونونو سره همكاري وكړي.
بلخوا د ملي يووالي حكومت اجرائيه رئيس يادې غونډې ته وويل، ټول هېوادوال رڼې او عادلانه ټاكنې غواړي.
عبدالله عبدالله هيله څرګنده كړه، چې د سياسي ګوندونو عملي او معقولو غوښتنو ته پاملرنه وشي، ځكه په وينا يې، پر سياسي ګوندونو سربېره ټول هېوادوال د رڼو ټاكنو د ترسره كېدو غوښتونكي دي.
كه څه هم د ولسي جرګې ټاكنو ته له يوې نيمې مياشتې كم وخت پاتې دى، خو سياسي ګوندونه او جريانونه لا هم پر خپلو غوښتنو، چې د ټاكنيز نظام د بدلون، د راى وركولو پر پروسې د څارنې او د راى وركوونكو د بايومټريك په اړه دي، ټينګار كوي.
کلید ګروپ په ټویټر او فیسبوک کې وګورئ
