په ننګرهار کې ۱۰ داعشيان وژل شوي او دوه مركزونه يې له منځه تللي

د ننګرهار په نازيانو ولسوالۍ کې د ملي امنيت ځانګړو ځواکونو د عملياتو په مهال ۱۰ داعش وسله وال وژل شوي او دوه مركزونه يې هم له منځه وړل شوي دي.
د دې ولايت د ملي امنيت رياست په خبرپاڼه كې راغلي، ځواكونو يې تېره شپه په نازيانو ولسوالۍ کې د داعش وسله والو پر دوو مرکزونو عمليات ترسره کړي دي.
د خبرپاڼې د معلوماتو له مخې، د دغو عملياتو په ترڅ كې ياد مرکزونه له منځه وړل شوي او ۱۰ داعشيان وژل شوي دي.
سرچينه وايي، په دې مركزونو كې په جلال اباد ښار کې د ترهګريزو بريدونو پلانونه جوړېدل، چې په کې موجود چاودېدونکي توکي، وسلې او مهمات هم له منځه وړل شوي دي.
سرچينه زياتوي، د عملياتو په مهال امنيتي ځواکونو او عامو خلکو ته زيان نه دى اوښتى.
داعش ډلې تراوسه په دې اړه رسنيو ته څه نه دي ويلي.