د سياسي ګوندونو اجماع نن د کابل ښار په بېلا بېلو سيمو کې د لاريونونو په ترسره کولو سره د خپلو وړانديزونو د عملي کېدو غوښتنه وکړه.
دوی د رای ورکوونکو د نوم ليکنې پروسې د بايومټريک کولو، د ټاکنو په سيستم کې د بدلون او د ټاکنو په پروسه کې د ګوندونو د نظارت د پياوړي کولو غوښتونکي دي.
د سياسي ګوندونو د اجماع يو شمېر پلويانو همدا اوس د کابل ښار د بنايي څلور لاره د ترافيکو پر مخ تړلې او د ټاکنو کمېسيون پر وړاندې شعارونه ورکوي.
دوی وايي، که يې غوښتنې ونه منل شي، خپلو مدني اعتراضونه به نور هم زيات کړي.
دغه راز د دغه اجماع يو شمېر نور پلويان بيا د کابل ښار د هوايي ډګر په څلور لاره کې راټول شوي او ورته غوښتنې لري.
دا په داسې حال کې ده چې د روانې اوونۍ په پيل کې د سياسي ګوندونو استازو له جمهور رييس غني سره ناسته لرله او په دې ناسته کې پرېکړه وشوه چې بايد يوه ګډه کمېټه جوړه شي تر څو عملي طرحې چمتو کړي.
