د ننګرهار ولايت د مرکز جلال اباد ښار د پنځمې ناحيې په اړونده سيمه کې د ټاکنو خپلواک کميسيون د سيمه ييز دفتر مخې ته چاودنه شوې.
د والي وياند عطاالله خوګياڼی وايي، تر دې مهاله د عامې روغتيا حوزوي روغتون ته د پېښې له ځايه دوه جسدونه او څلور ټپيان لېږدول شوي چې، د يوتن ټپي حالت نازک دی.
خوګياڼی وايي، د پېښې ډول تر دې مهاله معلوم نه دی خو په دې اړه څېړنې روانې دي
له بل لوري د ننګرهار ولايت د امنيه قومندانۍ له لوري په خپره شوې خبرپاڼه کې راغلي چې له دې پېښې د ننګرهار حوزوي روغتون ته دوه جسدونه او ۶ ټپيان لېږدول شوي دي.
ويل کېږي د پېښې قربانيان هم د ولسي جرګې د ټاکنو له وروستي لېست څخه د حذف شوي کانديد جاوېد زمان پلويان دي.
دا چاودنه داسې مهال کېږې چې، نن سهار د ټاکنو کميسيون دفتر مخې ته د ولسي جرګې له وروستي ليست څخه د لرې کړای شوي نوماند جاويد زمان پلويانو د اعتراض خېمه وهلې وه.
تر دې مهاله کومې ډلې د دغه پېښې مسووليت په غاړه نه دی اخيستی.
