وروسته له هغې چې وسله والو طالبانو د افغان حکومت مشروط اوربند ته مثبت ځواب ورنه کړ، د دفاع وزارت وايي چې د اختر په ورځو کې افغان امنيتي ځواکونو له لوري په ځينو ولايتونو کې تصفيوي عمليات روان دي.
د دغه وزارت وياند غفور احمد جاويد وايي، دا عمليات به تر هغې دوام پيدا کړي، څو وسله وال طالبان د حکومت له لوري اعلان شوي اوربند قبول نه کړي.
که څه هم جاويد په جګړه کې دواړو غاړو ته د اوښتو تلفاتو په اړه جزئيات نه ورکوي، خو وايي دغه عمليات په هغو سيمو کې ترسره شوي چې د وسله والو مخالفينو تحرکات په کې زيات دي.
جمهور رييس محمد اشرف غني د يکشنبې په ورځ د خپلواکۍ د ۹۹ کاليزې په مناسبت جوړه شوې غونډې کې له وسله والو طالبانو سره مشروط اوربند اعلان کړ.
له هغه يوه ورځ وروسته د جمهوري رياست وياند محمد هارون چخانسوري وويل که وسله وال طالبان اوربند وکړي، د افغان حکومت اعلان شوي اوربند به نافذ شي او کنه امنيتي او دفاعي ځواکونو ته هدايت ورکړل شوی چې خپلو عملياتو ته دوام ورکړي.
