د بلخ امنيتي چارواکي وايي، د دغه ولايت د چهاربولک ولسوالۍ د علي اباد په کلي کې د وسله والو طالبانو له لوري ۷ سيمه ييز پوليس او يو پاڅونوال وژل شوي دي او يو سيمه ييز پوليس هم ټپي شوی دی.
د دغه ولايت د چهاربولک ولسوالۍ د امنيه قومندانۍ سرپرست محمد الدين کليد ته وويل، وسله والو طالبانو د يوه پوليس په مرسته د علي اباد په کلي کې په يوه امنيتي پوسته تېره شپه څه باندې يوه بجه بريد کړی دی.
نوموړی زياتوي، د دغه پوستې يو تن پوليس له وسله والو طالبانو سره په اړيکه کې وو او د دوی بريد ته يې زمينه برابره کړې.
نوموړي زياته کړه چې وسله والو طالبانو د اوو پوليسو او يو تن پاڅونوال له وژلو وروسته د دوی وسلې هم له ځان سره وړي دي.
د دې ولسوالۍ امنيتي چارواکي وايي هغه پوليس چې له طالبانو سره يې لاره جوړه کړې وه، له دې بريد وروسته له طالبانو يو ځای له سيمې تښتېدلی دی.
