د پکتيکا ولايت اوسېدونکو ديوې پراخې غونډې په ترڅ کې دسولې په اړه له وروستيو هلو ځلو ملاتړ وکړ.
دوی له افغان حکومت او د افغان حکومت له وسله والو مخالفينو او نړيوالي ټولنې غوښتنه وکړه څو افغانانو د آرامۍ لپاره د سولې د راتلو په پار رښتيني هلې ځلې وکړي.
په دې غونډه کې د پکتيکا دبيلابيلو ولسواليو او لرې پرتو سيمو ګڼ شمېر قومي مشرانو، ديني عالمانو، دسولې شورا مسوولينو، ځوانانو او ښځو برخه اخيستي وه.
دپکتيکا ولايت دسولې شورا د دارلانشا مشر نواب خان وويل افغانانان نور جنګ نه غواړي او موږ ټول نن د همدې لپاره را غونډ شوي يو.
نوموړي زياته کړه، موږ له دې لارې ټولو اړخونو ته دا پيغام رسول غواړو چې په افغانستان کې روانه جګړه نوره د غځېدو وړ نه ده جنګ ښکېل اړخونه بايد اوږد مهاله اوربند وکړي څو تلپاتې سولې ته لاره هواره شي.