د افغانستان د پنځو زونونو د معلولو لوبغاړو تر منځ پرون په کابل کې د کرکټ شل اوريزې سيالۍ پيل شوې.
د کرکټ بورډ له لوري په خپره شوې خبرپاڼه کې راغلي چې څه موده وړاندې د معلولينو د کورني کرکټ سياليو د ترسره کېدو په هدف د پنځو زونونو په کچه د معلولو لوبغاړو د غوراوي ازموينه واخيستل شوه چې پکې له هر زون تکړه او با استعداده معلول لوبغاړي غوره شول.
دغه لوبې د روان زېږديز کال د جولای په ۲۸ مه پيل او د اګست مياشتې په ۴ مه پای ته رسېږي، د يادولو ده چې يادې لوبې د کرکټ بورډ او په افغانستان کې د يونيسف ادارې په ګډه همکارۍ ترسره کېږي.
