جمهور رئيس محمد اشرف غني نن له وسله والو طالبانو سره اوربند اعلان كړ او امنيتي ځواكونو ته يې امر وكړ، چې د اوربند په مهال پر دې ډلې ټول تهاجمي عمليات ودروي.
نوموړي نن په يوه ويډيويي پيغام كې وويل، د تېرې دوشنبې په ورځ د ديني عالمانو په غونډه كې د اوربند له شوي وړانديزه ملاتړ كوي او ورسره موافق دى.
جمهور رئيس غني زياته كړه، له طالبانو سره اوربند به د روژې مياشتې له ۲۷مې د كوچني اختر تر پنځمې ورځې دوام ولري.
د هغه په خبره، د امنيتي ځواكونو له لوري به د داعش، القاعدې او نورو نړيوالو ترهګرو ډلو په ضد عمليات روان وي.
د هېواد جمهور رئيس وايي، راتلونكې اونۍ به په يوه لويه غونډه کې د اوربند جزيات شريک شي.
دا لومړی ځل دی، چې يو افغان جمهور رئيس له طالبانو سره موقتي اوربند اعلانوي.
وسله والو طالبانو په لومړني غبرګون کې ويلي، د دوی نظامي کمېسيون به پر دې غور وکړي، چې د اوربند دا غوښتنه تاييد او که رد کړي.
