د افغانستان د کرکټ ملي لوبډلې ورو توپ اچوونکى راشد خان د ۲۰ اوريزو لوبو په تازه درجه بندۍ کې هم تر ټولو غوره توپ اچوونکى شو.
د کرکټ نړيوالې شورا يا آى سي سي له لوري په تازه اعلان شوې درجه بندۍ کې د ۷۵۹ نومرو په ترلاسه کولو سره راشد خان لومړى مقام خپل کړى دى.
د آى سي سي لخوا په اعلان شوي لېست کې د نيوزيلنډ ورو توپ اچوونکى ايش سودهي د ۷۰۰ نومرو په ترلاسه کولو سره دويم، د ويسټ انډيز سمويل بدري د ۶۹۱ نومرو په ګټلو سره درېيم او د پاکستان عماد وسيم څلورم مقام خپل کړى دى.
بل افغان لوبغاړي محمد نبي د کرکټ نړيوالې شورا د ۲۰ اوريزو لوبو د الراونډرانو په درجه بندۍ کې د ۲۹۲ نومرو په ترلاسه کولو سره د درېيم غوره الراونډر مقام خپل کړى او شهزاد محمدي بيا د توپ وهونکو په ډله کې لسم مقام ترلاسه کړى دى.
افغانستان د ۲۰ اوريزو لوبو په درجه بندۍ کې خپل نهم ځای ساتلی دى.
د يادولو ده، چې راشد خان څو ورځې مخکې د كركټ د ۵۰ اوريزو لوبو د غوره توپ اچوونکي مقام هم ګټلى و.
کلید ګروپ په ټویټر او فیسبوک کې وګورئ
