د زمبابوې د كركټ ملي لوبډلې افغانستان ته د پنځو يو ورځنيو لوبو دوهمه سيالۍ كې په ۱۵۴ منډو ستره ماتې وركړه.
دا لوبه، چې د متحده عربي اماراتو په شارجې لوبغالي كې ترسره شوه، پچه يې زمبابوې وګټله او د توپوهنې پرېكړه يې وكړه.
زمبابوې په ټاكلو ۵۰ اورونو كې د پنځو لوبغاړو په سوځېدو د افغانستان د كركټ ملي لوبډلې ته ۳۳۴ منډې هدف وټاكه، خو افغان لوبډلې دا هدف پوره نه كړاى شو او ټول لوبغاړي يې په ۳۰ اعشاريه يو اورونو كې د ۱۷۹ منډو له جوړولو وروسته وسوځېدل.
تر دې مخكې په لومړۍ يو ورځنۍ لوبه كې افغانستان زمبابوې ته د ۱۵۴ منډو په توپير ستره ماتې ورکړې وه.
د يادولو ده، چې د دواړو هېوادونو ترمنځ د كركټ د ۲۰ اوريزو لوبو لړۍ هم دوه – صفر د افغان لوبډلې په ګټه پاى ته رسېدلې وه.
د افغانستان او زمبابوې د كركټ ملي لوبډلو د پنځو يو ورځنيو لوبو لړۍ د روانې فېبروري مياشتې تر ۱۹مې نېټې دوام كوي او درېيمه سيالي يې سبا ترسره كېږي.
کلید ګروپ په ټویټر او فیسبوک کې وګورئ
