د افغانستان او زمبابوې ترمنځ د کرکټ د دوو ۲۰ اوريزو او پنځو يو ورځنيو لوبو لړۍ تېره شپه د متحده عربي اماراتو په شارجې لوبغالي كې پيل شوه او لومړۍ ۲۰ اوريزه لوبه د افغانستان په ګټه پاى ته ورسېده.
د لوبې پچه افغانستان وګټله او لومړى يې د توپ اچونې پرېکړه وکړه.
د زمبابوې لوبډلې په ټاكل شوو ۲۰ اورونو كې د نهو لوبغاړو په سوځېدو افغان لوبډلې ته ۱۲۱ منډې هدف وټاكه، خو افغانستان دا هدف په ۱۴ اعشاريه ۴ اورونو كې د پنځو لوبغاړو په سوځېدو پوره كړ او زمبابوې ته يې په پنځو وېكټو ماتې وركړه.
محمد نبي، چې ښه لوبه يې نندارې ته وړاندې کړه، د لوبې غوره لوبغاړى ونومول شو.
د افغانستان او زمبابوې د كركټ ملي لوبډلو ترمنځ به دوهمه او وروستۍ ۲۰ اوريزه لوبه نن شپه ترسره شي، چې د كابل په وخت د ماخوستن په اووه بجو او دېرشو دقيقو پيلېږي.
د دواړو لوبډلو د لوبو لړۍ به د روانې فبروري مياشتې تر ۱۹مې نېټې دوام وكړي.
کلید ګروپ په ټویټر او فیسبوک کې وګورئ
