د هلمند ولايت په مارجې ولسوالۍ كې ۱۴ سرحدي پوليسو ته مرګ ژوبله اوښتې ده.
يوې باورې امنيتي سرچينې د نوم نه ښودلو په شرط کليد ته وويل، چې تېره ورځ مازديګر ناوخته د مارجې ولسوالۍ په كمپ سيمه کې د سرحدي پوليسو پر دوو ټانكونو د سړک د غاړې ماين چاودنه شوې ده.
سرچينې زياته كړه، چې د دغې چاودنې له كبله شپږ سرحدي پوليس وژل شوي او اته تنه نور ټپيان دي.
خو ځينې نورې امنيتي سرچينې بيا د مرګ ژوبلې شمېره تر دې زياته ښيي.
بلخوا د هلمند د امنيه قوماندانۍ وياند عبدالسلام افغان په دې اړه بې خبري وښوده.
وسله والو طالبانو په دې تړاو رسنيو ته څه نه دي ويلي.
