ولسي جرګې او ولسواليو شوراګانو د ټاکنو د رايې ورکوونکو د نوم ليکنې او نوملړ مهالوېش ښيي، چې ټاکنې په ټاکلې نېټې يعنې د ۱۳۹۷ لمريز كال د چنګاښ په ۱۶مه نه ترسره کېږي.
د دغه مهالوېش د خپرې شوې كاپۍ له مخې، د رايې ورکوونکو د معلوماتو او نوملړ ليکلو بهير بايد د ۱۳۹۷ کال د وري مياشتې له شپږمې د زمري تر ۲۳مې نېټې برابر او بشپړ شي.
دې مهالوېش ته په پام سره د ولسي جرګې او ولسواليو شوراګانو د ټاکنو ترسره کېدو د چمتووالي ټول بهيرونه د ۱۳۹۷ كال د زمري تر ۲۳مې نېټې بشپړېږي، په داسې حال کې، چې د ټاکنو خپلواک کمېسيون د ټاکنو ترسره کېدو لپاره د ۱۳۹۷ كال د چنګاښ ۱۶مه نېټه اعلان کړې ده.
د افغانستان د ازادو او عادلانه ټاکنو بنسټ فيفا اجرايوي رئيس يوسف رشيد وايي، که چېرې د رايې ورکوونکو د نوملړ او نوم ليکنې دا مهالوېش کره او نهايي وي، د اندېښنې وړ دى.
خو د ټاکنو خپلواک کمېسيون دغه مهالوېش نهايي نه ګڼي او په خبره يې، ياد مهالوېش د دې كمېسيون د تخنيکي برخې لخوا برابر شوى، خو تراوسه د کمېشنرانو له لوري نه دى تاييد شوى او په اړه به يې نهايي پرېكړه وروسته وشي.
کلید ګروپ په ټویټر او فیسبوک کې وګورئ
