د ملي اردو چارواکي وایي، د لغمان ولایت الیشنګ ولسوالۍ کې د سېلاب یو اتم نمبر عملیات د ۸۶ وسله والو طالبانو په مرګ ژوبلې پای ته ورسېدل.
په ختیځ کې د ملي اردو له ۲۰۱ سېلاب قول اردو څخه کلید ته په را استول شوې خبرپاڼه کې ویل شوي، چې له تېرو څو ورځو راهیسې یې د لغمان ولایت په الیشنګ ولسوالۍ کې د ملي اردو په مشرۍ له نورو ځواکونو سره یو ځای د سېلاب یو اتم نمبر عملیات پیل کړي وو، چې د ۵۶ وسله وال طالبانو په وژنې او د ۳۰ په ټپي کېدو پای ته ورسېدل.
سرچینه وایي، په دغو عملیاتو کې ترنگ، شمرام، اچکزي، اسلام آباد، کړپه، گرگر، شکرمن، سرخ تپه، کرنجاوه او علیشنگ کهنه سیمې د وسله والو له شتونه پاکې شوي دي.
خبرپاڼه کې د دغو عملیاتو پرمهال افغان ځواکونو ته د اوښتې مرګ ژوبلې په اړه څه نه دي ویل شوي.
وسله والو طالبانو هم تر اوسه په دې اړه رسنیو ته څه نه دي ویلي.
