په خوست کې د ټاکنو خپلواک کميسون له لوري ۱۵۰ ښځو ته په ټاکنو کې د ښځو ونډه او رهبرۍ ته هڅونه تر نوم لاندې يو ورځنی پوهاوی ورکړل شو.
د ټاکنو خپلواک کميسون ځايي مسوولين وايي، دوی په ټوله مانا د ټاکنو ترسره کېدو ته تيار دي او غواړي عام خلک هم په دې پروسه کې ګډون کولو ته وهڅوي.
په دې ورځني پروګرام کې ښځو ته د دوی د رايې ارزښت په اړه هم خبرې وشوې.
ښځينه ګډونوالې دغلته د ښځو په رايه اچونه ټيګار کوي، ځکه دوی ځانونه د ټولنې نيمايي ګڼي. د دوی له ډلې مدني فعاله نصرين وايي، ښځې هم په سياسي ډګر کې د نرانو غوندې ځلېدلی شي.
د نصرين په خبره که چېرې ښځو ته وخت ورکړل شي، هر ورکړل شوی مسووليت په کاميابۍ سرته رسوی شي.
د ښځو چارو رييسه ملالۍ والي د ښځو لپاره د عامه پوهاوي دا ډول پرګروامونه ګټور بولي او وايي، چې دې سره دوی ته د ټاکنو په اړه پوره معلومات کېدی شي.
د خوست د ټاکنو خپلواک کميسيون مشر عبدالرحمن محبت هم وايي، چې ګډونوالې يې لوستې دي او په دې سره د رايې او ټاکنو دغه يو ورځنی پروګرام اغېزمن بولي.
په خوست کې د ښځو يوه اندېښه دا هم ده، چې دلته د ټاکنو پروسه کې دوی ته پوره سهم نه ورکول کېږي او له چارواکو د خپل حق غوښتنه کوي.
