وسله والو طالبانو په هلمند ولايت كې پنځو ملكي وګړو ته مرګ ژوبله اړولې ده.
د هلمند د امنيه قوماندانۍ وياند دوهم څارن عبدالسلام افغان کليد ته وويل، چې تېره ورځ ناوخته د ۶۰۱ نمبر لويې لارې اړونده سيمه كې وسله والو طالبانو د امنيتي ځواکونو پر يوې پوستې بريد کړى دى.
د نوموړي په خبره، د بريد په مهال د طالبانو له لوري يو توغول شوى توغندى د ملكي وګړو پر كور لګېدلى، چې له كبله يې څلور تنه وژل شوي او يو بل ټپي دى.
وسله والو طالبانو تراوسه په دې اړه څه نه دي ويلي.
