د لغمان ولایتي چارواکي وایي، د کابل ــ جلال اباد په لویه لاره د یوې ټرافیکې پېښې له امله درېیو تنو ته مرګ ژوبله اوښتې ده.
د لغمان ولایت د رسنیو دفتر وایي، نن سهار اته بجې د کابل ــ جلال اباد په لویه لاره د قرغیو ولسوالۍ اړوند عزیزخان کڅ په تره ګړ سیمه کې د یوه مارسډیز ډوله موټر چلوونکي د بې احتیاطۍ له امله موټر سایکل سره ټکر کړی، چې پرمهال یې د موټر سایکل چلوونکی وژل شوی او دوه تنه نور ټپیان شوي دي.
سرچینه وایي، موټر چلوونکی نیول شوی او اوسمهال د امنیتي ځواکونو په ولکه کې دی.
د کابل ــ جلال اباد په لویه لاره ډېر کله ورته پېښې د موټر چلوونکو د بې احتیاطۍ او د سړکونو د کم سورۍ له امله رامنځته کېږي، چې قربانیان یې لسګونه هېوادوال دي.
