د ننګرهار امنیتي چارواکي وایي، د جلال اباد ښار زړه مخابراتو چوک کې یو کس د نا معلومو وسله والو له لوري په ډزو سره وژل شوی دی.
د ننګرهار د امنیې قومندانۍ مطبوعاتي مسوول حضرت حسین مشرقیوال کلید ته وویل، چې نن سهار شاوخوا نهه بجې د جلال اباد ښار مخابراتو چوک کې د نامعلومو وسله والو له لوري د ښېوې ولسوالۍ د کوټې تارانو د سیمې یو اوسېدونکی په ډزو سره وژل شوی دی.
نوموړی وایی، دوی سیمې ته امنیتي ځواکونه لېږلي ترڅو د یادې پېښې عاملین پیدا او د قانون منګولو ته یې وسپاري.
بل لور ته بیا له سیمې یو شمېر هټۍ والو کلید ته وویل، چې د دوو موټر سایکل سپرو له لوري په یو تن ډزې وشوې او برید کوونکي له سیمې په تېښته بریالي شول.
تر اوسه پورې ددغې پېښې مسوولیت چا په غاړه نه دی اخیستی.
