د جان مك كېن په مشرۍ د امريکا د کانګرېس پنځه کسيز پلاوى کابل ته راغلى دى.
دغه پلاوى به نن له غرمې وروسته په يوه خبري غونډه کې ګډون وکړي او د خپل سفر د هدفونو په اړه به جزيات وړاندې كړي.
د ناټو د غوڅ ملاتړ ماموريت دفتر د يوې خبرپاڼې په خپرولو سره افغانستان ته د دغو سناتورانو سفر تاييد کړى، خو نور جزيات يې نه دي ورکړي.
افغان حکومت تراوسه كابل ته د امريكايي سناتورانو د سفر په اړه څه نه دي ويلي.
په دې سفر کې د امريکا د سنا د پوځي خدمتونو کمېټې له مشر جان مک کېن سره د سنا نور غړي لينډسي ګراهام، اليزابت وارِن، شلډون وايټ هاوس او ډېويډ پِرډو ملګري دي.
دغه پلاوى پاکستان ته له سفر وروسته افغانستان ته راغلى دى.
يادو امريكايي سناتورانو د پاكستان له ملکي او پوځي چارواکو سره د افغانستان د سولې او په سيمه کې د تروريستي ضد هلو ځلو په اړه خبرې وکړې.
کلید ګروپ په ټویټر او فیسبوک کې وګورئ
