په ننګرهار ولايت كې د سړك غاړې ماين چاودنې دولس تنو ملكي وګړو ته مرګ ژوبله اړولې ده.
د ننګرهار ولايت د رسنيو دفتر څخه خپره شوې خبرپاڼه كې راغلي، چې دا چاودنه پرون غرمه شاوخوا دولس بجې د اچين ولسوالۍ باندر درې سيمه كې د ملكي وګړو پر يو ډاډسن ډوله موټر شوې ده.
د سرچينې په وينا، په دې پېښه كې اووه تنه ملكي وګړي وژل شوي او پنځه نور ټپيان دي.
په خبرپاڼه كې زياته شوې، چې ټپيان د غني خېلو روغتون ته لېږدول شوي او روغتيايي حالت يې د ډاډ وړ دى .
سرچينه وايي، چې د سړک غاړې دغه ماين د داعش وسله والو له لوري ځاى پر ځاى شوى و، خو داعش ډلې تراوسه په دې اړه رسنيو ته څه نه دي ويلي.
