د امريكا د مشرانو جرګې ځينې غړي هڅه كوي، چې هند د امريكا د دفاع وزارت په همكارۍ په افغانستان كې خپل پوځي ملاتړ مشخص كړي.
په تازه اقدام كې د متحدو ايالتونو د مشرانو جرګې د پوځي خدمتونو كمېټې يو غړي پنټاګون ته وړانديز كړى، چې په افغانستان كې د هند د پوځي ملاتړ زياتوالي لپاره تګلارې مشخصې كړي.
دا وړانديز، چې د امريكا په مشرانو جرګه كې د الاسكا د استازي دن ساليوان لخوا تيار شوى و، د رايو په اتفاق د دې جرګې د پوځي خدمتونو كمېټې له لوري تصويب شو.
په هغه خبرپاڼه كې، چې د سناتور ساليوان له دفتر څخه رسنيو ته لېږل شوې راغلي، دا مقررات د امريكا د دفاع وزارت هڅوي، چې د افغانستان د دفاعي ملاتړ د ټينګښت په برخه كې د هند د رول زياتولو لپاره تګلارې وړاندې كړي.
په خبرپاڼه كې زياته شوې، چې دا ډول ملاتړ له وسله والو طالبانو سره په جګړه كې ګټور تمامېدلاى شي.
د يادونې وړ ده، چې ياد وړانديز د امريكا د جمهور رئيس ډونالډ ټرمپ او د هند د لومړي وزير نرېندرا مودي تر ليدنې او د واشنګټن له لوري په افغانستان كې د مثبت رول لوبولو له كبله د نوي ډيلي تر ستايلو څو ورځې وروسته شوى دى.
دا په داسې حال كې ده، چې تر دې وړاندې هم پنټاګون په يوه راپور كې هند د افغانستان باوري ملګرى ياد كړى و.
کلید ګروپ په ټویټر او فیسبوک کې وګورئ
