نن سهار شاوخوا شپږ نيمې بجې يوه ډله ځانمرګو بريد كوونكو په پكتيا ولايت كې پر ۳۰۳ سپين غر زون قوماندانۍ، امنيه قوماندانۍ او د پوليسو د چټك غبرګون پر قطعې بريد كړى دى.
لومړى د دغو درېيو امنيتي مركزونو پر ګډ قراول موټر بم ځانمرګى بريد شوى او وروسته وسله وال ځانمرګي بريد كوونكي د ودانيو داخل ته ننوتلي دي.
د ۳۰۳ سپين غر زون قوماندان پاسوال اسدالله شېرزاد رسنيو ته وويل، چې تراوسه پنځه پوليس وژل شوي او نهه تنه نور ټپيان دي.
هغه زياته كړه، چې امنيتي ځواكونو پنځه بريد كوونكي هم وژلي، يو يا دوه تنه لا مقاومت كوي.
د پېښې مسووليت وسله والو طالبانو پر غاړه اخيستى او لسګونو پوليسو ته يې د مرګ ژوبلې اړولو ادعا كړې ده.
