جمهور رئيس محمد اشرف غني وايي، دوى له پاکستان څخه سوله نه غواړي، بلکې پاکستان سره سوله غواړي او په خبره يې، دا ځل دغه هېواد ومنله، چې د سولې خبرو کې بايد نړيوال نظارت موجود وي.
نوموړي دا څرګندونې تېره ورځ په ارګ كې د کابل ښار د پوهنې مسوولينو او د لېسو امرينو سره په کتنه کې وكړې.
جمهور رئيس غني د پوهنې، سولې، ښاري نظم او فرهنګ په اړه د هغوى نظرونه او وړانديزونه واورېدل.
د جمهوري رياست مطبوعاتي دفتر څخه خپره شوې خبرپاڼه كې راغلي، د کابل ښار د پوهنې او لېسو مسوولينو په خپلو خبرو کې له جګړو وړاندې پخواني کابل کې د خلکو ترمنځ عالي ښاري فرهنګ، نظم، سليقې او ورورګلوۍ ته په اشارې له جمهور رئيس څخه وغوښتل، چې دوى ورنه بيا هماغه کابل غواړي.
د دوى په خبره، دا کار هغه وخت ممکن دى، چې قانون حاکم او حکومت له وسله والو مخالفينو سره د سولې پروسه چټکه کړي.
جمهور رئيس غني اصلاحات، سوله او ملت جوړونه مهم لومړيتوبونه وبلل او په دې اړه يې د يو ملي بحث د رامنځته کېدو پر اړتيا ټينګار وکړ. هغه زياته کړه، چې دا ملي بحث لومړى بايد په کابل کې پيل او بيا نورو ولايتونو ته وغځول شي.
