بهرنيو ځواكونو د ننګرهار ولايت په غني خېلو ولسوالۍ كې څلورو ملكي وګړو ته مرګ ژوبله اړولې ده.
د غني خېلو ولسوال عبدالوهاب مومند کليد ته وويل، تېره شپه د بهرنيو او افغان ځانګړو ځواکونو کاروان اچين ولسوالۍ ته پر لاره و، چې د غني خېلو د شېرګړ بازار په سيمه کې پرې د سړك غاړې ماين چاودنه شوې.
د هغه په وينا، له چاودنې وروسته بهرنيو ځواکونو پر يوه کور عمليات ترسره کړي، چې په ترڅ كې يې يو پلار له دوو زامنو سره وژل شوى او يو بل تن ټپي دى.
د ننګرهار والي محمد ګلاب منګل امنيتي ادارو ته د دغې پېښې د پلټنې سپارښتنه کړې ده.
بهرنيو ځواکونو تراوسه په دې اړه رسنيو ته څه نه دي ويلي.
