د پاکستان په پنجاب ايالت کې د سخت باران او طوفان له كبله لسګونو کسانو ته مرګ ژوبله اوښتې ده.
پاکستاني رسنيو د ځايي چارواکو له قوله ويلي، د پنجاب ايالت په بهاولنګر، فيصل اباد، ملتان، راجن پور او يو شمېر نورو لويو او وړو ښارونو کې د باران له كبله سېلابونه راوتلي، چې په ترڅ كې يې تراوسه د لسو کسانو د وژل كېدو او لسګونو نورو د ټپي کېدو راپورونه ورکړل شوي دي.
د پنجاب ايالتي چارواکي وايي، چې د باران له كبله ګڼ شمېر کورونه له منځه تللي، ټولې مواصلاتي لارې تخريب شوي او په روغتونونو کې بېړنى حالت اعلان شوى دى.
دغه راز د خيبر پښتونخوا ايالت په صوابۍ او ځينو نورو سيمو کې هم باران او په يو شمېر سيمو کې ږلۍ شوې، چې فصلونو ته يې زيان اړولى دى.
