په هلمند کې د امريکا د سمندري ځواکونو قوماندان جنرال ټورنر د دې ولايت په نادعلي ولسوالۍ كې پر سرحدي پوليسو د بهرنيو ځواكونو د هوايي بريد په اړه د جدي څېړنو خبر وركړ.
د هلمند ولايت د رسنيو دفتر څخه خپره شوې خبرپاڼه كې راغلي، وړمه شپه شاوخوا لس نيمې بجې د نادعلي ولسوالۍ لوى باغ سيمه کې پر يوې امنيتي پوستې د بهرنيو ځواکونو له لوري په تېروتنې سره هوايي بريد شوی، چې په ترڅ کې يې دوه سرحدي پوليس وژل شوي او شپږ تنه نور ټپيان دي.
جنرال ټورنر د هلمند والي او د نظامي شورا غړو سره ځانګړې ناسته کې پر دې پېښې ژوره خواشيني او خواخوږي څرګنده کړه او ډاډ يې ورکړ، چې د رامنځته شوې پېښې د څرنګوالي په اړه به حقيقت موندونکې څېړنې وشي.
هغه وويل، امريکايي ځواکونه له افغان امنيتي او دفاعي ځواکونو سره همکاري کوي او دا ورته هېڅکله د منلو نه ده، چې پر هغوى دې دغه ډول بريد ترسره شي.
د هلمند والي حيات الله حيات هم پر يادې پېښې ژوره خواشينې څرګنده کړه او ټينګار يې وکړ، چې په دې اړه دې جدي څېړنې ترسره شي.
