د ناټو سازمان چارواکي وايي، چې په افغانستان کې يې حضور د ترهګرۍ د له منځه وړلو لپاره دى.
د دې سازمان سرمنشي ينس سټولټنبرګ پرون د لندن د وروستيو بريدونو په تړاو سي بي اېس ټلويزيوني شبکې سره د مرکې په مهال ټينګار وکړ، چې ترهګري د ټولو هېوادونو لپاره ګواښ دى او دوى په افغانستان کې د ترهګرو ډلو د ځپلو لپاره خپلو هڅو ته دوام ورکوي.
هغه زياته کړه، چې د بروکسل وروستۍ غونډه كې پرېکړه وشوه، چې په افغانستان کې د وسله والو ډلو ټپلو په وړاندې به خپله مبارزه نوره هم چټکوي.
د يادونې وړ ده، چې درېيو تنو وړمه شپه د لندن پر پُل يا لندن برېج لومړی پر خلکو موټر تېر کړ او بيا يې د چاقوګانو په وسيله پر خلکو بريدونه وكړل، چې له كبله يې اووه کسان ووژل شول او لسګونه نور ژوبل شول.
د بريتانيا پوليس وايي، تراوسه يې د دې بريدونو په تړاو ۱۲ مشکوک کسان نيولي دي.
