د هند حکومت اعلان کړی، يو بالستيک توغندی، چې اټومي سرګلولې هم لېږدولی شي، په برياليتوب سره ازمويلی دی.
د هند د پوځي مطبوعاتي ادارې ويلي، چې ياد پرمختللی بالستيک توغندی د دې هېواد اوړيشه ايالت کې د ګرځنده زغروال موټر څخه توغول شوی دی.
هندي چارواکو ويلي، ياد توغندی د ۳۵۰ کيلومټرو په واټن هدف ويشتلی شي او د يو ټن اټومي سرګلولو د لېږدولو وړتيا هم لري.
هند دا ازموينه په داسې حال کې کوي، چې د کشمير په سر له پاکستان سره يې اړيکې تر بل هر وخته ترينګلې شوې دي او وړمه ورځ هم د کشمير په صفري نقطو کې د دواړو هېوادونو تر منځ جګړه شوې ده.
ويل کېږي، په دې نښته کې نسبتا درنې وسلې هم کارول شوې دي، چې دواړو لوريو ته يې مرګ ژوبله هم اړولې ده.
