د بښنې نړيوال سازمان په کابل کې د تېرې ورځې په لاريون کوونکو د امنيتي ځواکونو له لوري ډزې يو غير قانوني عمل ياد کړی او د افغانستان له حکومته يې غوښتي، چې د وژل شويو لاريون کوونکو عاملين بايد محاکمه شي.
په هغه خبرپاڼه کې چې د بښنې نړيوال سازمان له لوري خپره شوې، ويلي، په کابل کې په لاريون کوونکو د اوښکو ګاز کارولو او ډزې د ملکي وګړو په اړه د افغان چارواکو بې پروايي څرګندوي.
له بل پلوه ياد سازمان غوښتي، چې د زنبق څلور لارې بريد دې په سمه توګه وڅېړل شي.
په ورته وخت ياد سازمان په افغانستان کې د نړيوال سازمان ( يوناما) ته، په کابل کې په لاريون کوونکو د وژل کېدو په اړه اندېښنه څرګنده کړې.
افغانستان لپاره د يوناما ځانګړي استازي تاداميچي ياماموتو ويلي، چې د کابل د لاريون کوونکو غوسه د چهار شنبې د ورځې د بريد په اړه د درک وړ ده، خو تاوتريخوالی د حل لار نه ده.
هغه زياته کړې، سوله ييز لاريون د اساسي قانون له مخې د هر افغان اساسي حق دی او بايد امنيتي ځواکونه او لاريون کوونکي له تاوتريخوالي ډډه وکړي.
دا په داسې حال کې ده، چې تېره ورځ په لاريون کوونکو باندې د ډزو له کبله پنځه تنه لاريون کوونکي ووژل شول او څه کم لس تنه ټپيان شول.
