تاجکستان له افغانستان سره پر خپله ګډه پوله د ترهګريزو فعاليتونو پر زياتېدو اندېښه وښوده.
د تاجکستان د سرحدي ځواكونو قوماندان رجبعلي رحمان علي په يو خبري کنفرانس کې وويل، د تاجکستان پولو ته څېرمه په کندوز، تخار او بدخشان کې د ترهګرو حضور د اندېښنې وړ دى او ځواکونه يې دا مهال د تيارسئ په حال کې دي، ترڅو د هر ډول احتمالي ګواښ ځواب ووايي.
دغه تاجکستاني جنرال زياته کړه، چې له افغانستان سره پر ګډه پوله د تروريزم ترڅنګ د نشه يي توکو د قاچاق مسئله هم موجوده ده.
د نوموړي په وينا، له تېرو څو مياشتو راهيسې يې له افغانستانه ور اوښتونکي اته تنه قاچاق وړونکي وژلي او پنځه يې ژوندي نيولي دي.
دا په داسې حال کې ده، چې تر دې وړاندې روسيې هم تاجکستان سره پر ګډه پوله د ترهګريزو فعاليتونو په اړه اندېښنه څرګنده کړې وه او په دې برخه کې يې له خپل ستراتېژيک ملګري تاجکستان سره د هر ډول مرستې وړانديز کړى دى.
