په لغمان کې د سېلاب پنځه په نوم د افغان ګډو ځواکونو په تصفيوي عملياتو کې د شنبې په ورځ د دولت ۱۵ وسله والو مخالفينو ته مرګ ژوبله اوښتې او دوه تنه يې له يو عراده موټر سايکل او يو ميل راکټ انداز سره يو ځاى نيول شوي دي.
د لغمان ولايت د رسنيو دفتر وايي، چې په وژل شويو کې د وسله والو مخالفينو ځينې مهم غړي هم شامل دي.
د سرچينې په وينا، په دغو عملياتو کې افغان ځواکونو ته هېڅ زيان نه دى اوښتى.
سرچينه زياتوي، د عملياتو په مهال د مرکز او الينګار ولسواليو اړوند پهلوان بابا، قلعه نجاران، سرکاتبان، قلعه فتح الله، جاني قلعه، نور محمد خان بانډه، مير عثمان بانډه او ځينې نورې سيمې تصفيه او تلاشي شوې دي.
د دولت وسله والو مخالفينو تراوسه په دې اړه رسنيو ته څه نه دي ويلي.
