د ملي اردو چارواکي وایي، لغمان ولایت کې یې د روانو سېلاب یو پنځم نمبر عملیاتو پرمهال د هوایي او توپچي بریدونو له امله ۵۰ وسله والو طالبانو ته مرګ ژوبله اړولې ده.
په ختیځ کې د ملي اردو د ۲۰۱ سېلاب قول اردو مطبوعاتي مسوول ډګروال شیرین اقا فقیري کلید ته وویل، چې له تېرو دوه ورځو راهیسې یې د لغمان ولایت مرکز او الینګار ولسوالۍ په مربوطاتو کې د ملي اردو په مشرۍ له نورو اړوندو ارګانونو سر د سېلاب یو پنځم نمبر په نوم ګډ چاڼیز عملیات پیل کړي، چې تېره شپه په دې عملياتو کې ۳۲ وسله وال طالبان وژل شوي او ۱۸ نور ټپیان دي.
نوموړی وایي، په دغو عملیاتو کې یې له وسله والو ګڼ شمېر وسلې او ۲۵ عرادې موټر سايکلونه هم نیولي دي.
فقیري زیاتوي، په یادو عملیاتو کې افغان ځواکونو او د سیمې خلکو ته هېڅ زیان نه دی اوښتی.
وسله والو طالبانو تر اوسه په دې اړه رسنیو ته څه نه دي ویلي.
