د پاکستان د بلوچستان ايالت مرکز کويټې ښار کې د پروني ځانمرګي بريد د تلفاتو کچه لوړه شوې ده.
د جمعې په ورځ په کويټه کې د جميعت علماى اسلام ګوند د مخکښ غړي او د مشرانو جرګې د مرستيال مولانا عبدالغفور حيدري د موټرو پر کاروان چاودنه کې د ۲۵ کسانو د وژل کېدو او د څلوېښتو نورو د ټپي کېدو پخلى شوى و، خو روغتيايي چارواکو ويلي، چې د وژل شويو كسانو شمېر ۲۷ ته رسېدلى او د ټپيانو له څلوېښتو اوښتى دى.
د روغتيايي چارواکو په خبره، د مولانا غفور روغتيايي حالت د ډاډ وړ دى، خو د يو شمېر نورو ټپيانو روغتيايي وضعيت يې د اندېښنې وړ بللى دى.
د ياد بريد مسوووليت داعش وسله والې ډلې پر غاړه اخيستى.
