د هلمند ولايت په موسى کلا ولسوالۍ کې د افغان ځواکونو هوايي بريد کې د وسله والو طالبانو يو مهم قوماندان وژل شوى دى.
د هلمند له ۲۱۵ ميوند قول اردو څخه کليد ته رالېږل شوې خبرپاڼه كې راغلي، هغه هوايي عمليات، چې د افغان ځواکونو له خوا په موسى کلا ولسوالۍ کې ترسره شوي، په پايله کې يې د تورجان په نوم د وسله والو طالبانو هغه قوماندان وژل شوى، چې په ۱۳۹۴ کال كې يې په هلمند کې پر ښوراب پوځي اډه د بريد په مهال د ۱۵ ځانمرګو بريد كوونكو مشري کړې وه.
خبرپاڼه زياتوي، په دغه هوايي بريد کې د وسله والو طالبانو اړوند څو عرادې موټر هم له منځه تللي دي.
وسله والو طالبانو تراوسه په دې اړه څه نه دي ويلي.
