امنيتي چارواکي د هلمند په ګرشك ولسوالۍ كې له نږدې ۴۰۰ كيلو ګرامه چرسو سره د يو تن او همدارنګه په مارجې ولسوالۍ كې د ۱۰ شكمنو وسله والو د نيول كېدو خبر وركوي.
د هلمند د ۲۱۵ميوند قول اردو مطبوعاتي مسوول ډګرمن محمد رسول ځاځي کليد ته وويل، تېره شپه افغان امنيتي ځواکونو د ګرشک ولسوالۍ په حوض خشک سيمه کې ۳۸۰ کيلو ګرامه چرس، چې په يو ټيوټا ډوله موټر کې بار و، له موټر چلوونکي سره يو ځاى نيولي دي.
ځاځي د دې ترڅنګ دا هم وويل، د نړيوالو ځواکونو په يو هوايي بريد كې، چې د هلمند ولايت په موسى کلا ولسوالۍ کې ترسره شوى، د تورجان په نوم د وسله والو طالبانو هغه قوماندان وژل شوى، چې په ۱۳۹۴ کال كې يې په هلمند کې پر ښوراب پوځي اډه د بريد په مهال د ۱۵ ځانمرګو بريد كوونكو مشري کړې وه.
د هلمند د ۲۱۵ميوند قول اردو د مطبوعاتي مسوول په خبره، امنيتي ځواكونو په مارجې ولسوالۍ كې ۱۰تنه شكمن كسان نيولي دي.
وسله والو طالبانو تراوسه په دې اړه رسنيو ته څه نه دي ويلي.
