جمهور رئيس محمد اشرف غني وايي، دوى بار بار ويلي، چې افغانستان له نااعلان شوې جګړې سره مخ دى او ملګري ملتونه بايد له ډيپلوماټيکو لارو د دې جګړې په ودرولو کې خپل رول ادا کړي.
نوموړي دا څرګندونې د دوشنبې په ورځ په ارګ كې د ملګرو ملتونو د سرمنشي ځانګړي استازي يان کوبيش سره د ليدنې په مهال وكړې.
د جمهوري رياست مطبوعاتي دفتر څخه خپره شوې خبرپاڼه كې د جمهور رئيس غني له قوله راغلي، افغانستان لا هم د ملګرو ملتونو همکارۍ ته اړتيا لري، خو د چارو د موثريت او ښه والي لپاره بايد د دوى د ماموريت او مرستو اوسنى حالت په اساسي توګه بدلون ومومي.
د هېواد جمهور رئيس د ښې حکومتولۍ، د بېوزلۍ د له منځه وړلو، فساد سره د مبارزې او نورو برخو کې د ملګرو ملتونو مرستې وستايلې او زياته يې کړه، په يادو برخو کې شته ستونزو ته په پام لا ډېر کار او مرستو ته اړتيا ده.
بل خوا د ملګرو ملتونو د سرمنشي ځانګړي استازي يان کوبيش وويل، په افغانستان کې د دغه سازمان د ماموريت او چارو د لا ښه والي په هدف به د جمهور رئيس غني وړانديزونه او نظريات د ملګرو ملتونو سرمنشي سره شريک کړي.
