د پاکستان په کراچۍ ښار کې له وسله والو سره د امنيتي ځواكونو په نښتو او تصفيوي عملياتو کې د دېرشو ورانکارو كسانو د نيولو خبر ورکړل شوى دى.
د پاکستان پوځي چارواکو ويلي، د پلټونکو عملياتو په مهال يې د کراچۍ په زړه کې د القاعده شبکې دوه مهم قوماندانان هم نيولي او يو شمېر وسلې او مهمات يې ور څخه ترلاسه کړي دي.
د کراچۍ ځايي امنيتي ادارې وايي، د دې ښار په کورنګي، لياري، نظام اباد او يو شمېر نورو سيمو کې يې پرون ناوخته چاپې اچولي، چې په ترڅ كې يې له وسله والو سره نښتې هم رامنځته شوې دي.
کراچۍ سوداګريز ښار د پاکستان د نورو ايالتونو په څېر په دې وروستيو کې د ترهګريزو بريدونو او هدفي وژنو مرکز ګرځېدلى دى.
